12 વર્ષના એક બાળકે ઓનલાઈન ગેમ્સના ચક્કરમાં 90 હજાર રૂપિયા ઉડાવી દેતા પિતાએ આપી અનોખી સજા
મદુરાઈ: જો તમારું બાળક પણ દિવસભર ઓનલાઈન મોબાઈલ ગેમ્સમાં વ્યસ્ત છે, તો તમારે સાવધાન રહેવાની જરૂર છે. કોરોના મહામારી દરમિયાન બાળકોમાં ઓનલાઈન ગેમ્સની લોકપ્રિયતા ઘણી વધી ગઈ છે. આવો જ મામલો તમિળનાડુના રમાનાથપુરમ જિલ્લાના એક ગામમાં સામે આવ્યો છે, જ્યાં 12 વર્ષના એક બાળકે ઓનલાઈન ગેમના ચક્કરમાં પોતાની માતાના અકાઉન્ટમાંથી 90 હજાર રૂપિયા ઉડાવી દીધા.
હકીકતમાં, જેમને ગેમિંગનો ચસ્કો લાગી જાય, તેની આદત છોડાવવાની સરળ નથી હોતી, પરંતુ ઘણી વાર આ આદત મુશ્કેલીનું કારણ બની જાય છે. 8મા ધોરણમાં ભણતો બાળક ગેમ રમવામાં સતત મશગૂલ રહેતો હતો. પિતાને આ વાતની ત્યારે જાણ થઈ જ્યારે તેઓ એટીએમમાંથી રૂપિયા ઉપાડવા ગયા. બાળકના પિતા સેન્થિલ કુમારે જણાવ્યું કે, અકાઉન્ટમાં કુલ 97 હજાર રૂપિયા હતા, જેમાંથી 90 હજાર તેમના પુત્રએ ગેમ રમવામાં ખર્ચી નાખ્યા હતા.
સેન્થિલ કુમારે ગામમાં એક ઈ-સેવા કેન્દ્ર ચલાવે છે, જેમાં તેમનો દીકરો પણ મદદ કરે છે. અહીંથી જ તેને ઓનલાઈન પેમેન્ટ કરવા અંગે જાણ થઈ અને એ દરિયાન તેના હાથમાં તેની મમ્મીનું એટીએમ કાર્ડ આવી ગયું. તે પછી તેણે ઓનલાઈન ગેમ રમવામાં એટીએમ કાર્ડનો ઉપયોગ કરીને ઘણી વખત ટ્રાન્જેક્શન કર્યા અને મોબાઈલ પર આવેલા બધા મેસેજ ચાલાકીથી ડિલીટ કરી દીધા.
જ્યારે બાળકના પિતાને તેની આ હરકતની જાણ થઈ તો તેમણે તેને 1થી 90 હજાર સુધીની ગણતરી લખવાની સજા આપી. જોકે, બાળક પાંચ દિવસમાં 3500 સુધીની જ ગણતરી લખી શક્યો. તે પછી થાકીને તેણે પિતાની માફી માગી અને હવે ગેમ નહીં રમવાની ખાત્રી આપતા પિતાએ તેને માફ કરી દીધો.
ઉલ્લેખનીય છે કે, કોરોના મહામારીના કારણે હાલમાં દેશભરમાં સ્કૂલો બંધ છે અને બાળકો ઓનલાઈન અભ્યાસ કરી રહ્યા છે. જેના કારણે બાળકો મોબાઈલ પર વધુ સમય વિતાવવા લાગ્યા છે. આ દરમિયાન તેમને ગેમિંગનો ચસ્કો પણ જવાના કિસ્સા વધી રહ્યા છે. બાળકો ભણવાની સાથે-સાથે વિડીયો ગેમ્સ માટે પણ મોબાઈલનો ઉપયોગ વધારે કરવા લાગ્યા છે. ઈન્ટરનેટ પર તો ગેમ્સનો ખૂટે નહીં એવો ઢગલો છે. બાળકોની સાઈકોલોજીને બરાબર સમજતા આ ગેમ્સના ડિવેલપર્સ એવા-એવા સ્ટેજ અને એવોર્ડ તેમાં એડ કરતા રહે છે કે, બાળક ગેમ્સમાંથી બહાર જ ન આવે. કેટલીક ગેમ્સ તો એવી હોય છે કે, અમૂક સ્ટેજ પછી રૂપિયા ભરો તો જ આગળ જવાય અને એક વખત ગેમ્સનો ચસ્કો લાગી ગયો હોય એટલે બાળક આગળના સ્ટેજમાં જવા તમિળનાડુના આ બાળકે અપનાવ્યો તેવો રસ્તો અપનાવી લેતા હોય છે. ત્યારે બાળકો મોબાઈલ સાથે શુ કરી રહ્યા છે તેના પર માતા-પિતાએ સતત નજર રાખવાની જરૂર છે.
